Thursday, November 16, 2006

مسرحية زواجى
والله مش عارف أبدأ منين. كل القصة انى حبيت إنسانه عشان دينها و اخلاقها. و قامت بالتمثيل على اجمل وجه مستخدمة قناع "قال الله و قال الرسول". حبيتها و حبيت اهلها جداَ. أخلصتلهم من قلبى و كنت على فطرتى. كنت عايز مراتى تكون أسعد زوجة فى الدنيا. تزوجتها رغم رفض اهلى الزواج منها لأسباب سرية. أقنعونى انهم موافقين عليا لذاتى دوناَ عن أى شىء آخر. بس الغريب ان حمايا عرض عليا انه سوف يقوم بإنشاء حمام سباحة فى فيلتى التى بجوار الفيلا التى استأجرها و اللى قال انه هيشتريها, بس الغريب انه كان ممكن بكل بساطة يعمل حمام سباحة فى الفيلا الى المفروض يشتريها, مش فى بيتى اللى مايملكش منه اى حاجة. عدى عليا الموضوع ده و انا نايم فى العسل زى الحمار
اتجوزنا و قضينا شهر عسل من الصعب ان يقضيه اى انسان طبيعى, لأن زوجتى القنوعة طلبت ذلك. قضينا شهر العسل فى روما و باريس و جبال الألب و فينيسيا ..... أقول ايه .... حمار!. بمجرد عودتنا من شهر العسل و بدأت أشعر ان اهلها عايزين يتحكموا فى حياتنا, بس بردو مش عارف السبب. و بقوا يقارنوا بينى و بين النطع زوج أختها اللى عنده 33 سنة و عاطل و عايش عند حماه اللى بيصرف عليه و على مراته. و بردو مش عارف سبب انهم بيساعدوه و بيعجزونى. بدأ يظهر سوء اخلاقهم كلهم بما فيهم زوجتى البارةالتى ممكن ان تضحى بكرامتى مقابل رضاْ أى حيوان من أهلها. ازداد الخناق و ازداد تحريض أهل فدوى عليا
دارت الأيام و بدأت احكى لأهلى ما يحدث. و فعلاَ صدمنى ابى بعد ان اخبرنى بالحقيقة. اتضح ان حمايا المحترم عليه قضايا و لا يمكن ان يمتلك اى شى لأنه سوف يتم الحجز عليه علاوة على انه مستولى على ميراث خاله الذى تبناه بعد موت امه. لذلك كان يريد ان ينشىء حمام سباحة ليكون مسمار جحا الذى يمكنه من العيش فى بيتى كشريك بعد ان يتم طرده من الفيلا الإيجار و يكون بلا مأوى. بعد ان عرف حمايا انى اعرف عنه هذه المعلومات اتهمنى انى مريض نفسياَ و لازم اروح لطبيب نفسانى. رحت لطبيب نفسانى عشان اثبت انى سليم و بالفعل قال ان المشكله تكمن فى اهل زوجتى, و كانت زوجتى حاضرة وقت الكشف. تدهور الحال حتى فاض بى و طردت زوجتى و طلقتها و خسرت 110,000 جنيه مصرى علماَ بأن بها عيوب خلقيه لم اكن اعلم بها و التى تمكنى من الطلاق بدون خسائر بل و بتعويض
أنتهت المسرحية و إليكم حقيقة الأبطال حسب الظهور
زوجتى: انسانه كذابة و ضحية اهلها
حمايا: كان يعمل ساعى عند خاله الى متبنيه و تواطأ مع موظفة الحسابات للسطو على املاكه بعد موته
حماتى: هى موظفة الحسابات و العقل المدبر
اخت زوجتى: شحاتة بمعنى الكلمة و زوجه لنصف رجل
زوج اخت زوجتى: شحات ايضاَ و اهله تبرئوا منه بسبب هذا النسب المشرف
تمت بحمد الله

Comments: Post a Comment



<< Home

This page is powered by Blogger. Isn't yours?